اخبار روز

ددغه پلاوي غړي او دسیمه‎ییزو ارګانونو دخپلواکې ادارې دکورني تفتیش رئیس عبدالحبیب جبارخېل دیکشنبې په ورځ آزادي راډیو ته وویل، پلاوي له امنیتي کمرو مستند اسناد راټول کړي، له چارواکو سره یې لیدلي او د پېښې ځای یې هم بررسي کړی دی. ښاغلي جبارخېل وویل، پلاوی دا مهال په راپور چمتو کولو بوخت دی چې د ده په خبره د څېړنو پایلې به سبا حکومت ته وسپاري.

دی وايي: "مستند اسناد مو پیدا کړي دپېښې ځای مو بر رسي کړی، ټپیان، دقضیې دواړو خواوو او له امنیتي او کشفي ارګانونو سره مو لیدلي، له هغوی مو پوښتنې درلودې، ځوابونه مو ورنه اخېستي دي، تحقیقات بشپړ شوي، اوس په اسنادو مصروف یو چې مستند راپور ورنه جوړ شي، بیا به مقاماتو ته وسپارل شي، لومړنۍ موندنې دا ښيي چې والي صاحب ویلي چې ما خپلو کسانو ته هدایت وکړ چې ورشئ ویې نیسئ او کورته یې راوړئ، بیا یې مداخله کړې ده او بیولی یې دی."

دبلخ دولایتي شورا غړي اصف مهمند دتېرې دوشنبې په شپه په الوتکه کې له کابله دمزارشریف په لور سفر درلود چې دده دڅرګندونو له مخې دبلخ په هوايي ډګر کې دوالي عطا محمد نور دکسانو له‎خوا نیول شوی دی. دا په داسې حال کې ده چې دبلخ دوالي ویاند منیر فرهاد له دې وړاندې ویلي و چې دبلخ دولایتي شورا غړی اصف مهمند دلوی څارنوالۍ دحکم له مخې پولیسو نیولی دی.

اصف مهمند دپنج شنبې په ورځ په کابل کې ديوې خبري ناستې پرمهال دا ادعا وکړه چې دبلخ دوالي دساتونکو له خوا تر نیول کېدو وروسته، دښاغلي نور یو زوی دده دچپ غوږ یوه څنډه پرې کړې او خپله عطا محمد نور او ساتونکو یې وهلی ډبولی هم دی. په ورته وخت کې دبلخ دوالي ویاند مني چې داصف مهمند دنیولو هدایت عطا محمد نور ورکړی خو وايي، دوالي کورته نه دی وړل شوی.

منیر فرهاد آزادي راډیو ته وویل، دقضیې په اړه دحقیقت موندونکي کمېسیون پایلو ته په تمه دي. دی وايي: "دوالي صاحب په هدایت نیول شوی، خو دوالي صاحب کورته نه‎ دی وړل شوی، موږ دحقیقت موندونکي کمېسیون له لوري دقضیې رونټیا ته په تمه یو، که موږ ووایو داسې نه‎دي شوي، مقابل طرف ته به دمنلو وړ نه‎وي، که مقابل لوری ووایي چې دا کار نه‎دی شوی، موږ یې نه قبلوو، موږ دپلاوي له لوري دقضیې روڼتیا ته په تمه یو."

دبلخ دوالي عطا محمد نور او دولایتي شورا دغړي اصف مهمند ترمنځ اختلافات څه نه‎وې خبره نه‎ ده، بلکې له دې وړاندې هم ددوی ترمنځ خپل منځي اختلافات موجود وو. دا چې دا قضیه په اړه څېړنې څه ښيي او دافغان حکومت، عدلي او قضايي ارګانونه چلند به یې په وړاندې څه وي وخت به یې په اړه ځواب ووايي.

 به ارتباط این خبر:

آصف مهمند: پسر عطا محمد نور شکنجه ام کرد