دوی وايي، افغان کډوال دایران په بېلابېلو ځایونو کې، په سړکونو، دبسونو په تمځایونو او لارو کوڅو کې له سپکاوي او تاوتریخوالي سره مخ دي. په تهران کې مېشت یو افغان کډوال، چې دپنځه کسیزې کورنۍ سرپرست دی او څلور کاله مخکې ایران ته دکار په لټه تللی، شکایت کوي چې په وروستیو کې دایراني پولیسو ترڅنګ عام خلک هم له دوی سره ناوړه چلند کوي. نوموړي، دنوم دنه خپرېدو او دغږ دبدلون په شرط، آزادي راډیو ته وویل چې عام ایرانیان، دبدو ردو ترڅنګ، افغان کډوال سپکوي او ان تاوتریخوالی ورسره کوي.
"دوه ورځې مخکې مې یو افغان ولید، په تهران کې نږدې شل کسان راغلل او هغه یې وواهه. کله چې دغه ډول مسله رامنځته شي، بیا عام دوکانداران، موټرچلونکي او ان په سړکونو روان ایرانیان افغانان وهي او ټکوي یې. کوم افغان کډوال چې ایران کې دي، په دې شپو ورځو کې ممکن ونه توانیږي چې ان ډوډۍ پیدا کړي، ځکه چې په هر ځای کې چې افغانان ګوري، ایرانیان ورته وايي: افغانانو، ولې خپل هېواد ته نه ځئ؟" له ایرانه تازه راستنې شوې کورنۍ هم د یو شمېر ایراني وګړو له بد چلنده ترخې خاطرې لري.